Leydi Gine e Ngaluuji Mu'un

Gine men ko leydi nando mun dhuudha der
Afriki on, si a humpa dyento nanaa fotaa.
 
Ndar pelle Fuuta, e avdhemun, kollaad e mun,
dunkiije mun, mo remii e maje o doomataa.
 
Kollaadhe Timbi no weyyhitii a wiay ko jon
thuddaadye dhuudhudhe wuppi liili  dhe yoorataa!

Maadhun ko gate fontaadhe ebbhere kuuledhen,
ko guluuji sogone, dhe nyobbataake, dhe feerataa.

Dhii tayndhi men uumooji weldhi ndiyan mu'un,
dhi ilay dhi yaara no bolle hawjudhe yaarata.

Pete maji wuppudho woo e muudhun labbhinay,
ko wanii mo lootike hoore maddye o ninsataa!

Thuddiiji maji no surta hamma ka weeyo dow,
hino wonta duule, dhe saayha, gese fow dhondhita.

Dhee jurdhe uuyudhe, doole maddye no waawi
dunyude e yiltindirde ko seere jandhunde waawataa!

Ko ga leydi Gine dhoo thandhi dhuudhudhi wudditii,
hidhi tubbi dhoo, hidhi wonti maaje dhe bheebhataa.

Gine dhoo no wai wano loonde njande nde horsataa,
tufanaande budde ko yarna Afriik yarnitaa!

Dhen budde iliray dhon si hammira Maali maa
Senegaali maa Gine men Bissao dhe uddataa.

Baafin e Dyaaliba, Dimma Toomini, lintu dhii,
dhii dhoo yonay ko no seeditoo ko mi haalata.

Daro fowtodhaa ley lekki haknuki bhaarodhaa
ley dhowdi makki e naage maarasi deyyhitaa;

Tuma immidhaa, nder yaadu maa ndun lumbudhaa
thaangol, yaraa tuma lootidhaa, haa dhondhitaa;

Dhun wonay sabu seedagol maa ghirritoo
dhii moyyhereeji dhi Leydi Gine ndin bhurdataa!

Ngee naanqe Afriki wuluge wulnay diidedhen,
si dhe surta tamoyoo wonta duule dhee fuuyata!

 

Wallafuyee Thierno Abdourahmane Bah


ALT NAME

Thierno Abdourahmane Bah