Si a atthu laawol ukkidhaa e buruuji men sordhaa
e dhowle pitaaji leddhe dhe yooraraa.

Si ko sengo nano maa nyaamo ndaarirdhaa yiaa
dhon dukke dimdhe no bhendi mor hino junnitaa.

Hidhe junnitii wano kootonoy paykoy deyoy,
kala yiidho woo wewlay o haawoo dhun fota!

Si a lintu, lintaa laare , poore , e boyle men,
nete men, e sungala, meeko , kura tuma lintataa.

Paykoy e tholli e baadhi fow hino nyaama dhun
hino wuudha siika, no aata subhindira wippita.

Dhun dhoo ko sedha e leddhedhen ka buruuji men,
mo wi’ii oo  lintay fow, o etoto o lannataa.

Nder kowledhen kadi miijitee hino heewi tef
nooneeji leddhe rimaydhe bhenda dhe tultataa!

Leemunne, mango e mendarinii e katthu men
e piyaaje dhen e gorooje moyle dhe sangataa.

Kafe, kuukunaati e leddhe tugi dhun fow mu'un
ko ngaluuji leydi me'en, galuuji dhi hayrataa.

Nandi pitaaji gorooje Tuukoro bhawludhi,
wano niwre setto nde lewru nibbhi a faljataa!

Maa janfu maa Koobaa ko ton kai ittetee, goro
bhurdhe moyyhude, bhurdhe welde dhe sangataa!

Wa banaana en sardenji mun hay werlidhaa
feeteewo, ngon yanataa e leydi ngo sottataa!

 

Wallafuyee Thierno Abdourahmane Bah