Fii Aydhe e Kollaadhe

Jooman tagii ndii Leydi eltani en ndi

fiigolleeji men wuuren e nee mo lannataa.

Ndar taskodhaa dhee aydhe mayri no weyyhitaa
haa fuuya yiitere haynagol dhun hattata!

Kala woo ko aawaa maa remaa maadhun tutaa
woni maaro maa tiga fonnye bantara yeddataa.

Maa ngawri maa mbahe gawyhe sukkar fow mu'un
hino moyyha leddhe tutaadhe wuuray yoorataa.

Koobaa Tateema no ebbhanaa golleeji buy
sukkar e maaro sonyaama sonyitaa sankitaa.

Isiinu sukkar on no dhon gila duubhi buy
hino wurba yewroo thondi sukkar senditaa.

Kundaara men Gine fow si nangir ton demal
monibee hebhay ngesa leydi lutta ko lannataa!

Dhee aydhe Gaawal men mo ebbhii jundi mun
ektaaru mun ko guluuji ujune dhe mettataa.

Kisi men e Nyandan aydhe njane hidhe weyyhitii
hidhe moyyha ton mo remii thowandhe dhe mettataa.

Ko wanii Faraana remirdhe mun dhen lellataa
ndin leydi men kan remirdhe muudhun bontataa.

Kankan e Sigiri no yaaji leydhe remirdhe mun
mo remir tarakter maa sarin fow tundataa.

Kollaadhe Timbi no woyyhitii gollaama ton
sarden tabaa e putee banaana ko lellataa.

Koolun ko aynde Koyin si nden gollaama fii
ka remee ko hay si ko Fuuta fow remi lannataa!

Dhee aydhe men kollaadhe men tuma dhee toaa
heegeeji martay leydi men hara artataa!

Nyaamen ko sonyudhen kon ko heddii yeeyiten,
dheya Leydhe Afrik soodanen bhe ko sattataa.

 

Wallafuyee Thierno Abdourahmane Bah


ALT NAME

Thierno Abdourahmane Bah