Allaahu tagi dhee pelle feghi dhe e Leydi men
wadhi pelle leydi e pelle kaayhe dhe funnataa.
 
Si wanaa mo andina andataa dhee pelle fow no jogii
nafaaji dhi bhibbhe Aadama yiitataa.
 
Nooneeji maajje no dhuudhi goddhe no jolti ley
nooneeji goo hino toowi tulondiri dillataa.
 
Gila nyande leydi tagaa ndi tagida e pelledhen
jamanuuji dhuudhudhi feyyhirii dhe dhe bontataa.

Nafa maaje on hino dhuudhi linten seedha mun:
poodhay tobhooji dhi wanthinoo hara heltataa,

Kala ledhe njane no darii no wiidori thendhe fow hino
nyappa ton dhowdiiji, ndaaru a yeddataa.

Kala maasiyeeji no faggoroo e kudheeli mun
yara bhulli mun jaayhoo nde hiiri ka waalataa.

Oogirdhe buy ko ga pelle woni wano njandhe en
fogo men e sila e ngaluuji hewdhi dhi hayrataa.

Wano manganeezi e irniyoomi wiaama dhun
no hebhoo e nder dhee pelle men tuma dhabbhitaa.

Pammeeji dhin woni thuudhi kulle buruure dhen hidhi
suudhoyoo dannaabhe ton nde bhe waanyataa.

Beki deeniyaabhe ko sellinirtee tooke kon
ko e majje jasetee nyawndiree tuma munthitaa.

Tugu mungu men ko e maje jasetee yewritee
loowee e der pinkaaje losi hara woopataa.

Wano fello Mon'nimba to, Loolaa, andu ngon hino
heewi njandhe ko sqintinaa woo lannataa.

Gine fow ko Moninimba sebhii fii toowugol
hino hikki dhon ngoya fello Maali ngo joltataa.

Maadhun Simandu ka leydi Beyla ngon kadi,

Maa fello Kaakulimaa ga nawnubhe ndikkata.

Wano fello Luuraa Maali ngon le tagoodi mun
hino wai wadebbo e endhi mun fas seedataa!  

Maa fello Gangan, fello Tinka no fowtoyee e
seraaji mun dalabaa ndiyan mun heltataa.

 

Wallafuyee Thierno Abdourahmane Bah