Yiitere N'Den no ila Gondhi

Abdourahmane gedhal Shayxu Aliou no wii: ndee yimore ko yurminirnde yubbhumi dhun e haqqee musiddho amen yurmeteedho Thierno Mamadu Lamine, faatii dho e nyande talaata jeedhidhi sabbordu suumaye, hitaande fergu wuluure e teemeddhe tati e thappandhe jeegoo e nayi. Midho haala, ko mi wallinordho Allahu, komi fawiidho e Makko:

 

Yiitere nden no ila gondhi, keyhe dhen ko munthadhun;
bhernde nden no waylitoo, nandhe dhen ko faadhinaadhun.

Nange ngen no wenyi, lewru ndun kadi no wenyi,
weeyo ngon no nibbhiti, fow muun no mumaa.

Annora on no e baasal, yimbhe bhen fow no e niwre;
bhe fow mabbhe hibhe e sonko; alhaali on no yurmi.

Fii hattagol moodibbo kulo Allah, koohoo aynitiidho,
jom munyal, mo kanyun nyande okkitirgol ko andadho

Ko o dhowdi miskinbhe, sorirde mabbhe, dhabbirde mabbhe,
ko o faabo mabbhe; dendanaangal mabbhe ko yurminteebhe ka makko.

Yidhugol musibbhe makko worbhe, e bandiraabhe makko,
ko tabitudhun ka bhernde makko; bhe fow ko teddinaabhe ka makko.

Dokkal ko aada makko, munyal ko lasli makko,
diina ko himme makko; weltagol hentoo yeeso ko andaadhun ka makko.

No e jikkuuji makko kulol Allahu, e atthugol si wona Landho tagudho on,
kuudhe makko dhen e telen dina ko nyennyaadhun.

Ko o newiidho, ko o nantiidho, ko o teddudho wonkii,
ko o jom jikkuuji toowudhi: kanko e moyyhingol ko o andaadho

Bhure fow taggaama ka kasangeeji makko, ko sabu dhun
taggira dokkal, bhoggi dokkal ko tayhaadhun.

Limataaku, moftataake bhure makko:
ko hombo limata gebhe suudhaadhe?

Jamaanu ko woni aada mun ko ardingol kala
jom bhural e nennugol aawase haabhaadho,

Hebhii mo nyawu ronkindho; o belii e hoore
ndaddhudi bhaldhe teemedere ko o muuseteedho.

Dhun sabinbini faatunde makko; e moyyhugol timmoode
mofti musiddho an on! yimbhe fow ko sugu dhundhoo yidhi.

Ko e jeedhidhi sabbordu suumayee e nyalande talaata,
nyande jowi Yuliyu hitaande yimbhe weltaare ko yirbhinaadhun

Ko honno welirantammi weldhe? ko mi weddidho,
koohoo an on ka hoore leydi ko o waasaadho!

Ko honno Iaabhirantammi dakammeeji? ko mi weddiidho
koo hoo an on ka nder leydi ko o surraadhoton, yurmaadho!

Ko An yo Reweteedho an, On Mo rentiddho alanaa dhun,
Yeru alanaamo, yo an wurdho dartordho fan muudhun

A fodii Aljanna Maadha toowudho, kala jom
kulol Allaahu: fodoore Allaahu nden Ie ko nyennyaadhun.

Musiddho an on ariima, himo jortii hunnugol Maa ahdi Maa
ndin ko fodudhaa. Fodoore Allah nden ko nyennyaadhun.

Musiddho an Lamine ariima, ko An woni Teddudho,
mo arataa e dambugal Mun bonnudho e toonyaadho

Musiddho an Lamine nyiibhii ka nder qabru makko,
kanko faade e yarluyee, e fowtere, e urli, ko o yinnaadho.

Jabhu moyyhi makko dhi o wadhi, wadhaa
bondhi makko e nder kankiranwal sutura sokaangal.

Ko an yo ben Kaba, ko an yo musiddho an, dhaano non e nder qabru maa,
ko a fowtiidho wonki, bhuubhudho yiitere, yurmaadho!

Yottinaa salminaango amen faadee e babirabhe meen, nyiibhaa
ka tumbere yimbhe, nokku ka moyyhereeji waddhindiraa,

Dhabbhana men sorirde nde men weltiniree,
nyande hawrugol amen e ma nyande thuudhi dhin yirbina.

Ko an yo koto Shayxu Amadu, anditu waajuuji babaen
fii jarriboraadho balaau, soxlinaadho

A yiay ton piiji dhi no weltine e o musiiba dhoodhe:
sattingol musiiba ko nhinyaadhun.

Ko an yo koto Siraaju, wata a sattin, an ko a thanhe amen
hadhooje bone, yimbhe Allah bhen ko reenaabhe.

Ko an yo kotoo Mamadou, dhuytu ko yiaymi e ma soxla:
bheynguure babaen nden, ko ayni dhun ko Landho dartordho fan Mudhun,

Ko onon yo heddiibhe e musibbhe, yo on piyire misal
sabu ko yarlidhon kon: baraji Allah dhin ko mawninaadhi.

Ko haa dhoo haadhantammi dartagol, ko mi yarliidho
sugewol yimre nden, sabu juutingol ko haabheteedhun.

Yettoode wonanii Allah! yo Allaahu tagudho en,
juulu e Nulaadho meen reenaadho e fii geddi.

E Ahli en makko, e Sahaaba en makko, fanna suniidho no wia e wullugol :
yiitere nden no ila gondhi, keeyhe dhen ko munthaadhun.

 

Wallafuyee Thierno Abdourahmane

Nyande 26 Cha'aban 1364 ferugol Nulaadho Muhammadu
(Firo Hadja Aminatou mo moodi Ahmadou Laariya)

ALT NAME

Thierno Abdourahmane Bah