Yo musibbhe an midho lannitora ndee yimre an
waadyuudyi, midho yidhi tasko dhon ado puryhagol.

Si tawii no haari ka huutoron dhun huutoron
si tawii ko liddu mu'un mi tori on yaafagol.

Kala Woo ko heddhen non e moyyhere anditen
woni hoore mun maa binde mun, ngol rindhugol.

Hino dhoo misal waungal wa tindol,. tasko ngal
a taway ko bhuri kala piidyi aduna ko rindhugol

Arabuudyo dyuldho ariino galle Nulaadho men,
o wi'ii : « Mi bambii Neene an nabhi haddyugol ;

Gila Leydi an nabhi Makka hakkunde mun no yoni
teemedhe buy miiluudyi, tampumi bambugol. »

O wi'i: « Ko an yo Nulaadho Dyooman, yeetolan
si tawii mi yobhitii neene an ngola yangagol! »

Si Nulaadho on dyaabii mo wi’i :« kii yangi maa,
yobhitaali hay ottande makko ka reedegol.

Nhata makko fewndo dyibintedhaa si a miidyi dhun,
maa woofagol ma aynugol ma e lootugol! »

O wi'i: « A yobhitii Neene maa woo nyande tawdhaa
goddho hino yeeyaa mo, soodi mo kurkugol;

Si a sottoyii mo e dyuudhe on dhon fewndo dhon,
nabhudhaa mo, dyonnitudhaa mo bhuttu e rindhu gol,

Dhon non haray a yobhii mo. « Dhun dhon andiraa
ngol rindhugol hettoo no hattini mawnugol.

Maakiino Sayidinaa Aliiyu e fewndo mun.
« Wata en neir bhibbhe meedhen puydhugol,

Wota gooto inuu ko needi mun tun neeretee,
dyibinaadho-bee ko dyamaanu mun, tertee tawal,

Neiree bhe needi dyamaanu mabhhe si anditon
dyamanuudyi men hino seedi needi e dyanqgugol. »

Gila non o maaki dhu'un yonii teemeddhe tati
e wuluure duubhi, musibbhe taskee ngal misal,

En faamirii dhon wonde yimbhe zamaanu bee
arday e needi mu'un. Geren hetten bhural,

Bhee mawbhe men lintaabhe naane bhe huutorii
ndimu mabbhe ngun, bhe fewni Diina e laamagol.

Haa porto felli bhe fooli ndyaggi bhe dyanfitii.
Waliyaabhe mabbhe e lambhe nangaa daalambol.

Midho nodda on yo musibhe an nootee geren
ndimu men no tabitira; fow yo nangine gollugol.

Ndimu men wadhii en ylmbhe teddubhe anditen
ado rindhugoI ndiya fisgaraari e paatawol,

Gollen wadhen soobee remen dyangen mahen.
Faalaadho ndimu muudhun yo nyiibhu ko gollugol.

Yo mi darto dhoo, dhun dhoo yonay ko no fuddho-
ree. No yimoore dyuutiri seedha adday haabhugol ,

Ndee yimre an timmii, mo dyangi nde dyangitii
o wiay gorel yirnunqel nde ngel dyon mirnyagol

Kono non o faamay fudhagol Taariikha men.
si o Faama Ndyubhudi Leydimen. o etoo dewal

Allaahu dyuulu e Annabiidyo e Aali en
e sahaaba en, hisnaabhe haa tuma ummutal.

Labé nyande 25 Nowabur 1974

Wallafuyee Thierno Abdourahmane Bah

Thierno Abdourahmane Bah