Gollen ko golle e gilli bhantata leydi fow,
fii mayri lolla ndi hetta haybamo fandhataa.

Elten jamaa men ekkiten fow gollugol
fii yimbhe nde no bhantoo ko golle bhe nangata.

Shinuwaabhe bhen e koneeli mun hollii misal,
gila duubhi noogay bhen no golla he haabhataa.

Amerik gerdi no gerdetee fii sendugol
ndii Leydi Shinuwaa haa bhe tawoyi bhe gaynataa.

Si bhe jokkitoyi Shinuwaa bhe ghirrii Dawla on,
bhe tawaa ka woote bhe holli yhoyre bhe seedata.

Mo tawii ko faalaa kon wadhaali yo faale kon ko wadhaa
o seeda e mettu bhernda o jokkita.

Gerden no bhee dhoo gerdi non dhate mabbhe dhen
dhe bhe rewri dhen, rewren dhe wakkilo dhen fota.

Jaaman no yaltude Keerawaani ko leydi men
jey dhin ngaluuji dhi lannataa dhin hayrataa.

Dhee boowe men ko ngaluuji tun soomii e mun
tuma dhen jasa irtaa enee Gine waasataa!

Dhee boowe wondhe ka Leydi Boke golleeji mun
tuma gaynoyaa: ngalu men mo lintii gaynataa.

Dhee boowe wondhe Tugee e Tunkurumaa Konaa
Nde Suwiisi irti dhe muntyi fogo on lellataa. 

Dhee pelle Mon-Nemba ko soomudhe njandhe buy;
dhen fow nde irtaa aldhugol Gine tongataa!

 

Wallafuyee Thierno Abdourahmane Bah

---

---