Hino dhodhe waju; si tawu ko goonga jabhee,
si tawu ko fenande, seekee munthiton, hara yaltataa.

Dhee dhendhe leydi me’en, geren dhee wurnitee,
wona windeteedhe e jangeteedhe, dhe madjataa.

Si wanaano argol porto ngol, hari mawbhe men
fokkintini jandeeji moyyhi dhi pordhataa.

Bhen non e fandhude aala mun maa feere mun,
dhun dhon hadhaali bhe golla golle dhe bontataa

Ndaaree enen, aalaaji fow hino woodi buy:
a yahay ka yiddhaa, fewndo yiddhaa hewtataa.

Si tawi enen en wakkilaki no jangiree,
en ninsoyay, hebhoyen feloore nde lannataa

Faalaabhe jangude aruno landii Annabiijo
bhe landitii mo: « Ko duubhi jelu men jangata? »

Si Nuladho on jaabii bhe, wii : « Fuddhoode mun
ko ga woofegol, ko ga surregol dhun hattata. »

Dhun dhon ko wiude alaa mo hewtaa jangugol;
hay gooto feyyhaa jangugol. Fahmen fota!

Tuma jande tawoyi remoobhe woo, aynoobhe woo,
golloobhe fow hino jangi, bonnudho yultataa.

Nder teemedere fow nyande tawi thappandhe jeenayi
on no jangi, mo hoolorii Gine ninsataa.

Fotten aree! Fotten aree! Fotten aree!
Fotten wonen neddhanke gooto mo puydhataa!

Moni bee yo yhettu korun mu’un e bedhun mu’un,
jangen mahen Gine men, mahoodi ndi bontataa.

Kala woo ko ittata madjereeji e bherdhe dhen,
dhun innetee gandal; mo andi lesdhataa.

Woni gande diina, e gande aduna, ko fow mu’un
yamiraa yo jange: mo jangi faami, o  ninsataa.

Jooman tagii en, luutindiri dhee dhendhe men:
e ko honno non mo jabhaali jangude warrata?

Andee ko fewnata bhanta neddho, ko jangugol
mo no jangi wallay leydi makko, ndi heydhita.

Ndaaree ko gandal yhetti yimbhe suguubhe men,
nabhi haa ka lewru, bhe addi piijii dhi huubhataa!

Kala on mo jangaa, neemoraadhi no fooli on;
no wiaa ko on bhuri madjineede, o faamata.

Nanataa, si faama ko wowlanaa, yiataa le men
si taskoo; hino wai wa nagge nge wowlataa.

Jangen, geren jibinaabhe meedhen janginee
bhen ayna ndimu, hay hubbu juhi en foolataa

Gandal ko aaden andinaa e sukaaku mun,
naatay e makko, fenhoo ka hagghil, yaltataa.

Sabu jannugol paykun no wai wano siifugol goolol
e hayre: ko hay si neebhii bontataa!

Si ko mawdho, jannude dhun no wai wano diidugol
thiifol e hoore ndiyan a gaynay tun muta!

Ko Nulaadho maakannoo sukaabhe zamaanu mun,
nde bhe landino mo : « Ko honto hara men jangata? »

O wii bhe: « Hay si ko Shiinu seenee dhabbhugol gandal! »
Mo andii, andu on dhon joltataa.

 

Wallafuyee Thierno Abdourahmane Bah

---

---